Blauring

Ich bin d Nemi und momentan Scharleiterin vom Blauring. Sit em 2012 ghör ich zum Leitigsteam vom Blauring. Mir machts mega Freud mit de Chind chönne zäme z schaffe. Nach langer und intensiver Planig vomene Alass isches für mich s schönste wemer gsehd, dass d Chind Froid hend a dem womer plant hed. Ich gange i die 4. Kanti und wird ab August 17 es Sozialpraktikum mache. Dört chan ich minere Lideschaft, de Zämearbet mit Chind noche go. Das Jahr hilf ich intensiv bi de Planig vom Pfingstweekend mit und hoffe, dass es au damal en riese Spass werd werde.

 Kurse:

Ich bin d’Regina und sitt 2011 Leiterin im Blauring und vorher scho villi Jahr als Chind debi gsi. Ich bin froh über jedi Erfahrig, jedes Erlebnis und jedes Hindernis wo ich im Blauring gha han und wo hoffenli no folged. Mer chan sehr vill lerne für s’witere Läbe. Darum würd ich de Verein au i jedem witerempfehle! 😉

 Kurse:

Ich bin im Blauring will es mi usem graue Alltag holt und ich eifach ich sälber si chan, s Leiterteam isch hammer und am beschte gfalled mer die unvergässliche Lager wo mer händ.

 Kurse:

Ech kenne de Blauring sit minere Chindheit well min Brüeder emmer vo de Jungwacht gschwärmt hed, ech han au welle debi si und jetzt woni debi ben welli nömme go. Es gfallt mer bsunders das ich mich wie innere grosse Familie fühle im Blauring.

Ich bin d’Céline ond bin Leiterin vo de Gruppe Quatschfrösch. Es macht mer mega Spass mit de Chind öpis z’bastle, sowie mit ihne ganz vil anderi tolli Sache z’erläbe. Ufs nöchschte Sommerlager freu ich mich scho sehr. 

Ich ben sehr gern im Blauring, well ich Chind sehr gern han und mehr met ene so viel chan mache. De Blauring esch für mich en tolli Abwechslig zum Bruefsalltag. Mit de Chind chan mer au guet mol kreativ si und emmer neui sache usprobiere. Aber ned nome met de Chind verstah ich mich guet sondern au met em tolle Leitigsteam.

Ich ben d’Noemi und bin sit em August 2017 als Hilfsleiterin in Blauring debi. Ich kenn de Blauring scho sit minere Chindheit und bin damals ide Primarklass scho mal es Blauringmeili gsi. Das ich wieder im Blauring ben, han ich de Blauringleiterinne z verdanke. Sie händ mehr vell luschtigi und unvergässlichi Blauringerlebniss verzellt, was schlussendli mis Intressi gweckt hed. Ich find de Blauring en tolli Sach, well mer  met jüngere Generatione Kontakt hed und schöni Moment chann zäme sammle.

Sälü zäme *wink*! Anno dazomol (2006) bin ich als siebejährigi Jasmin, zumne stolze Blauring-Meitli worde und han bis jetzt cooli Lager, Gruppestunde und anderi Aläss i dem Verein döffe erläbe. Sit ich 2014 i die quirrligi Leitertruppe ufgnoh worde bin, chan ich au i verschiedene OK’s wie zum Bispiel bim Fonduplausch Verantwortig überneh. Vor allem will ich Köchin bin, pässlet mir das Amt als Tätschmeisteri ide Chuchi scho no recht.
D’Gruppestunde mit eusere Gruppe „Crazy Monkey Squad“ (crazy isch fasch undertribe) probiered d’Barby und ich natürli möglichst crazy z’gstalte, damits mit eusne junge Ladys nie langwilig wird.
Mini Designer-Karriere hani mit em Fanartikelämtli mittlerwile is rolle brocht, drum sind gspannt was es bald neus im Blauring-Shop gid.
De Blauring wird mir nie verleide, es isch eifach nume fätzig i somne Verein döffe debi z’sii 🙂

 Kurse:

Ich ben sett 14 Jahr im Blauring ond sett 6 Jahr Leiterin. Wenni gad ned metm Blauring onderwegs ben, beni entweder im Turnverein aztreffe, oder lerne wi mer as Chemielaborantin am beste Sache zom explodiere bringt.

 Kurse:

Scho die chli Andrea esch nach ehrere erste Groppestond, ide zweite Klass, vom Blauring begeisteret gsi. Höt beni zwar au ned riesig 😉 aber glich na näb mim Studium, met vell Engagement ond Motivation im Blauring debi.
Als Kassierin lueg ech, dass eusi Finanze stemmed.
Mis Lieblings-OK esch s’Sommerlager-OK drom beni au scho s‘ dritte mal bim organisiere metdebi.
Sett rond 4 Johr plan ond füehr ich Gruppestunde för d’Klammeräffchen dore. Bald werded oisi Mäitli Leiterinne woruf ech mech riesig freue ond natürli au chli stolz bin! 😉
Werum ech im Blauring bin? Well mer im Blauring emmer vell Spass hed ond neus erläbt, will mer lehrt kreativ z’si und Verantwortg z’überneh, will mer Fründe för’s Lebe chan fende, will mer enand hilft ond will mer Sache för’s Lebe lernt. Chorz ond knapp: Lebensfreu(n)de!

 Kurse:

Saletti zäme, ech ben d’Barbara, sit 11 Johr im Blauring ond Leiterin vo de Beste ond ufgstelltischte Blauringmäitli. 😉
Das Jahr ghör ech am OK vom Chranze ond em Fonduepläscher ah. Ech hoffe witeri Erfahrige dörfe z’sammle ond en gueti Sach vom Blauring (ond de Jungwacht) chönne z’Präsentiere.
Wenn ech grad mol grad ned im Blauring ben, verdien ech mini Brötli als Innedekorateurin.

Ganz toll am Blauring fend ech, dass mer förs Lääbe chan lehre. Mer chan kreativ si ond metbestemme. Mer lehrt Verantwortig för sech ond die andere z’öberneh ond chan ganz, ganz, ganz vell tolli Sache erläbe. Mer verbringt zäme en huufe loschtigi (Groppe-)Stonde ond Lager im Huus, oder im Zält – mängisch au onder freiem Himmel, wo immer in Erinnerig blibed! 🙂

Kurse:

Mooooin, ich heisse Rahel, bin 19i und schlüsse momentan d’Kantonsschuel ab, endlich.
Jede Mäntig und Mittwoch hani fätzigi Gruppestunde mit mine Mädels. Suscht beni für eusi Unterkünft im Lager und s’Material im Allgemeine zueständig. Han jetzt scho 5 tolli Jahr als Leiterin dörfe erlebe und ich freue mich uf jedes witere Jahr! 🙂

 Kurse:

Ich bin Katj, 19i und schaffe als Medizinischi Praxisassistentin, darum isch mis Ämtli im Blauring au Apithek und bin bi allne Ahläss für die Verletzte und Kranke zueständig. 🙂
Ich bi sit de 2. Klass im Blauring und vo Ahfang ah isch de Verein en grosse Teil vo mim Läbe gsi. Dur ihn han ich Erfahrige und Erlebniss gmacht, wo ich nie ih mim Lebe wird vergesse. Zum Bispiel han ich imne Lager zum erste Mal es WC putzt.
Ide Schar fühlt mer sich immer wie en Teil vonere riesige Familie und mer heds eifach mit (fast) allne guet. Im Blauring wirded dir mega wichtigi Wert vermittlet, wie zum Bispiel Toleranz, z’friede si mit dem wo mer het, dass all ufenand müend ufpasse und s’wichtigste: Freud am Läbe und das mer au eifach Mal dörf Seich mache.

 Kurse:

Ich bin d’Geri und schaffe als MPA. Ich ha für alli Chind emmer es offnigs Ohr und falls es Bobo hend chönds zu mer cho. Im Blauring bini set de 2.Klass und ha emmer en mega tolli Zit gha und möcht us dem Grund de Chind s gliche ermögliche als Leiterin

 Kurse:

Min name isch Alina, ich bin 19ni und bsuech momentan d’Fachmittelschuel in Wohle. Nach de FMS wird ich Pädagogik studiere, um Mittelstufelehrerin zwerde. Ich bin im Blauring sit de 2. Klass und für mich hed de Blauring scho sit det immer en wichtigi Rolle gspielt. Mer chan ned nur mit ganz vielne andere Kind tolli Lager und anderi Ahläss erläbe sondern findet au Fründe fürs Lebe.

 Kurse:

Hallo ich heisse Eveline (Evi) Hürlimann und mache en Usbildig als Chemielaborantin.
Sit em 2006 bin ich im Blauring z’Boswil. Durch die viele Ämtlis und OK’s ih dene ich bereits gsi ben, han ich veli neui Sache döffe lerne. Am Blauring gfallt mir vorallem s’Zämesih, s Lache und s Spass ha. Ich han dur de Blauring Fründe fürs Lebe gfunde.

 Kurse:

Ich, Carmen, bin sehr gerne im Blauring, weil wir immer viel Action und Spass haben.
Meine Meitli sind eine aufgeweckte Gruppe, die mir jeden Montag versüssen. 🙂

Im Blauring sorge ich dafür, dass die Hompage immer auf dem aktuellsten Stand ist. Ich bim im OK vom Heinzelmänndlitag vertreten und freue mich bald bei Ihnen zu Hause Hilfe zu leisten.

 Kurse:

Hallo ich bis d’Irina. Ich ben scho sit de 2. Klass im Blauring und es ghört scho langsam wie zu mer. Ich finds en gueti Abwächslig in Alltag und ha durch de Blaurich vell wechtigi Sache wie au de Umgang „mitenand“ glehrt.

 Kurse:

Ciao zäme ich bin d’Laura, und chume vo Besebüre. 🙂 Im Blauring chamer so viel Spass ha ond ganz tolli Lüt kenne lerne. Ich nime sehr gern ah de Aläss ond ah de Leiterrundene teil. Das Jahr bin ich im Pfingstweekend OK debi und freu mi scho riesig druf.

 Kurse:

Ich bin d‘ Steph ond das Jahr bini im Heinzelmänndli-OK und im Lager-OK
Mis Blauring-Ämtli isch d Kasse, wo ich luege das eusi velle coole ahläss emmer richtig abgrechnet werded.
Met minere Gruppe Klammeräffli dueni am liebste öpis bastle. Dass chunt au devo, well ech nach de FMS Kunst möchti studiere.
Gli, gli werdet eusi Blauringmeitli au Leiterinne woruf ich mich natürli sehr freu!

De Blauring esch för alli e grossi Bericherig. Leider bin ich ned sit ahfang ah debi was ich mega bereue.
Ich han gern  das Gfühl neumed ufghobe z’si, mit öperem chönne z’rede oder z’lache. Eifach 100% so si wie ich bin, ob zeme mit de Chind oder im Leitigsteam.

 Kurse:

Ich bin d’Ronja ond ben Leiterin vo de welde Häxe. Ech han feli neui Mensche käneglernt durch de Blauring. D’Lager fendi s Beschte well mer den zäme velli tolli Moment chönd erläbe. 

Ich bin im Blauring, well ich Chind sehr gern han. Am beste find ich, dass ich durch de Blauring anderi Lüt kennelerne chann. Dur de Blauring hani neui Fründe fürs Läbe  gfunde. Aber am beste find ich emmer no s Sommerlager, det erläbt mer velli tolli Moment.

Hallo ich bin d Laura und gane sit sechs Johr i de Blauring. Ich hans gliebt id Gruppestunde z ga und han emmer druf gwartet endlich Leiterin z si, das bin ich jetzt au und drüber mega froh!

Hoi zäme, ich ben d Vera. Ich ben sit ech ide 2.Klass ben im Blauring und ha mich scho emmer uf die Ziit als Leiterin gfreut. Und jetzt beni sett em Lager 2018 ide lässige Leitergruppe ufgno worde. Ich find de Blauring eifach nur super! Mer lernt ganz vell Neus, mer chan kreativ sii, Verantwortig überneh, mer chann au Sache lerne wo ich für mis Läbe chann bruche. Usserdem erläbt mer im Blauring die loschtigschte und coolste Erlebniss. Ich chönt stundelang vo mine Erinnerige verzelle, wo ich no es Blauringmeitli gsi ben. Ich chas chum erwarte wieder is Lager z go! Und ganz bsonders freu ich mich druf das Jahr die jüngste Blauringmeitli döffe ufzneh und met ihne tolli Gruppestunde chönne zmache! 

Hallo, ich bin d Enya und bin sit zwoi Johr im Blauring. Im Sommerlager 2018 bini Leiterin worde.  Ich finde de Blauring mega cool, well mer dete vell lüt chann kennelehre und au vell Zit mit sine Fründe chann verbringe. Mer machts au mega vell Spass met de Chind z bastle und kreativ zsii, aber s beschte sind für mich d Speli wo mer im Sommerlager und Pfingstweekend spilled. 

Ich bin d’Shana und ich bin scho sit de 2.Klass im Blauring. Im Moment gang ich ad Kanti in Wohle und wett spöter Lehrerin werde. Im Blauring gfallt mer das mer met villne coole Lüt zäme isch und mer immer ganz vell Spass zäme hett.